आंबोली : हॉकीच्या मैदानावर कौशल्य, वेग आणि जिंकण्याची जिद्द यांचा सुरेख संगम घडवत सिंधुदुर्ग सैनिक स्कूल, आंबोलीच्या क्रीडापटूंनी जिल्हास्तरीय शालेय तसेच नेहरू कप हॉकी स्पर्धेत दिमाखदार कामगिरी करत विजेतेपदावर आपली मोहोर उमटवली. शालेय हॉकी स्पर्धेत १४, १७ व १९ वर्षांखालील वयोगटांत सैनिक स्कूलने सर्वोच्च स्थान पटकावले, तर १७ वर्षांखालील नेहरू कप हॉकी स्पर्धेतही विजेतेपद मिळवत सैनिक स्कूलच्या शिरपेचात आणखी एक मानाचा तुरा खोवला.
क्रीडा व युवक संचालनालय, जिल्हा क्रीडा परिषद तसेच जिल्हा क्रीडा अधिकारी कार्यालय, सिंधुदुर्ग यांच्या वतीने सिंधुदुर्ग सैनिक स्कूल, आंबोली येथे जिल्हास्तरीय शालेय हॉकी स्पर्धा व नेहरू कप हॉकी स्पर्धेचे आयोजन करण्यात आले होते.
⚡ १४ वर्षांखालील गटात २-० ने दणदणीत विजय
१४ वर्षांखालील शालेय मुलांच्या गटात स्टेपिंग स्टोन ग्लोबल स्कूल, कोलगाव आणि सैनिक स्कूल, आंबोली यांच्यात रंगलेल्या सामन्यात सैनिक स्कूलच्या खेळाडूंनी आक्रमक खेळाचे दर्शन घडविले. स्वप्निल आनंदे आणि श्रेयश मुसळे यांनी प्रत्येकी एक गोल करत संघाला २-० असा शानदार विजय मिळवून दिला.
🏆 १७ वर्षांखालील गटात गोलांचा चौकार!
१७ वर्षांखालील शालेय मुलांच्या अंतिम सामन्यात सैनिक स्कूल आणि स्टेपिंग स्टोन ग्लोबल स्कूल, कोलगाव आमनेसामने आले. सुरुवातीपासूनच आक्रमक खेळ करत सैनिक स्कूलच्या खेळाडूंनी सामन्यावर वर्चस्व गाजविले. आदर्श अष्टेकरने दोन गोल, तर पार्थ नाईक आणि पावन परब यांनी प्रत्येकी एक गोल करत संघाला ४-० अशा एकतर्फी विजयासह विजेतेपद मिळवून दिले.
🥇 १९ वर्षांखालील संघाचीही विजयी घोडदौड
१९ वर्षांखालील मुलांच्या शालेय हॉकी स्पर्धेतही सैनिक स्कूलच्या संघाने दमदार खेळाचे प्रदर्शन करत विजेतेपद पटकावले. त्यामुळे शालेय हॉकीच्या तिन्ही वयोगटांत सैनिक स्कूलने आपले निर्विवाद वर्चस्व सिद्ध केले.
🏑 नेहरू कपमध्येही सैनिक स्कूलचा झेंडा!
जिल्हास्तरीय नेहरू कप हॉकी स्पर्धेच्या १७ वर्षांखालील मुलांच्या अंतिम सामन्यात सैनिक स्कूलचा सामना मिलाग्रीस स्कूलच्या संघाशी झाला. या सामन्यात सैनिक स्कूलच्या खेळाडूंनी उत्कृष्ट सांघिक खेळ करत ३-० असा दणदणीत विजय मिळविला. आदर्श अष्टेकरने दोन गोल, तर पावन परबने एक गोल करत संघाच्या विजयात मोलाची भूमिका बजावली.
या शानदार कामगिरीमुळे सैनिक स्कूलच्या क्रीडापटूंनी जिल्हास्तरावर आपली ताकद दाखवत विभागस्तरीय स्पर्धेची दारे ठोठावली आहेत.
या यशस्वी कामगिरीमागे क्रीडाशिक्षक मनोज देसाई, शिवराज पवार, जयराम कोळी आणि सतीश आईर यांचे मार्गदर्शन लाभले.
सैनिक स्कूलच्या क्रीडापटूंच्या या उल्लेखनीय यशाबद्दल संस्थाध्यक्ष सुनील राऊळ, सचिव जॉय डान्टस, संचालक मंडळ, कार्यालयीन सचिव दीपक राऊळ, प्राचार्य नितीन गावडे तसेच शिक्षक व शिक्षकेतर कर्मचाऱ्यांनी सर्व विजयी खेळाडू व क्रीडा प्रशिक्षकांचे अभिनंदन केले. तसेच आगामी विभागस्तरीय स्पर्धांसाठी खेळाडूंना शुभेच्छा दिल्या.
