सावंतवाडी : ज्ञानदानाच्या पवित्र कार्यातून असंख्य विद्यार्थ्यांच्या आयुष्याला दिशा देणाऱ्या आणि आपल्या शिस्तप्रिय, प्रेमळ व उपक्रमशील व्यक्तिमत्त्वाने विद्यार्थी, पालक आणि सहकाऱ्यांच्या मनात अढळ स्थान निर्माण करणाऱ्या मिलाग्रीस प्रशालेच्या ज्येष्ठ शिक्षिका टीचर मारिया फर्नांडिस आज नियत वयोमानानुसार सेवानिवृत्त झाल्या. त्यांच्या प्रदीर्घ, समर्पित आणि प्रेरणादायी शैक्षणिक सेवेच्या सांगतेनिमित्त मिलाग्रीस हायस्कूलच्या सभागृहात भावपूर्ण कृतज्ञता सोहळ्याचे आयोजन करण्यात आले.
या वेळी उपस्थित मान्यवर, शिक्षक, शिक्षकेतर कर्मचारी, विद्यार्थी आणि कुटुंबीयांच्या उपस्थितीने संपूर्ण सभागृह भावनिक वातावरणाने भारावून गेले. अनेक वर्षे विद्यार्थ्यांच्या मनात ज्ञानाची ज्योत प्रज्वलित करणाऱ्या आपल्या लाडक्या शिक्षिकेच्या सेवापूर्तीचा क्षण अनेकांसाठी आठवणींचा आणि कृतज्ञतेचा ठरला.
- या शानदार सोहळ्यास सिंधुदुर्ग धर्मप्रांताचे आदरणीय राईट रेवरंड बिशप डॉ. आग्नेलो पिन्हेरो, माजी चेअरमन बिशप एमेरीटस फादर ऑल्विन बरेटो, सिंधुदुर्ग धर्मप्रांताचे विकार जनरल फादर अँड्र्यू डिमेलो, मिलाग्रीस कॅथेड्रलचे रेक्टर तथा प्रशालेचे मॅनेजर फादर मिलेट डिसोजा, मिलाग्रीस ज्युनिअर कॉलेज व हायस्कूलचे मुख्याध्यापक फादर रिचर्ड सालदान्हा, इंग्रजी प्राथमिकचे मुख्याध्यापक फादर ऑल्विन गोंसाल्वीस, मराठी प्राथमिकच्या मुख्याध्यापिका सिस्टर कविता, हायस्कूल सुपरवायझर टीचर संध्या मुणगेकर, माजी उपमुख्याध्यापिका सिस्टर मेबल यांच्यासह मारिया फर्नांडिस यांचे कुटुंबीय, आजी-माजी शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते.
- विद्यार्थ्यांच्या सर्वांगीण जडणघडणीत मोलाचा ठसा!
आपल्या प्रदीर्घ सेवाकाळात टीचर मारिया फर्नांडिस यांनी केवळ पुस्तकी ज्ञान न देता विद्यार्थ्यांच्या व्यक्तिमत्त्वाला आकार देण्याचे कार्य केले. शालेय अभ्यासक्रमासोबतच विविध सहशालेय, सांस्कृतिक आणि शैक्षणिक उपक्रमांमध्ये विद्यार्थ्यांना त्यांनी सातत्याने प्रोत्साहन व मार्गदर्शन दिले.
त्यांचा शिस्तबद्ध, कर्तव्यनिष्ठ आणि त्याचवेळी मायेचा ओलावा जपणारा स्वभाव हा त्यांच्या व्यक्तिमत्त्वाचा विशेष पैलू होता. त्यामुळे विद्यार्थी, पालक आणि सहकारी यांच्या मनात त्यांनी आपलेपणाचे नाते निर्माण केले. त्यांच्या मार्गदर्शनातून घडलेले अनेक विद्यार्थी आज विविध क्षेत्रांत उल्लेखनीय कामगिरी करत असून, त्यांच्या यशामध्ये मारिया फर्नांडिस यांच्या संस्कारांचा आणि मार्गदर्शनाचा मोलाचा वाटा आहे.
यावेळी उपस्थित मान्यवरांनी त्यांच्या प्रदीर्घ आणि समर्पित शैक्षणिक कार्याचा गौरव करताना शाळेप्रती असलेली त्यांची अखंड निष्ठा, कर्तव्यावरील श्रद्धा आणि विद्यार्थ्यांप्रती असलेली आत्मीयता यांचा विशेष उल्लेख केला. त्यांच्या सेवेमुळे मिलाग्रीस प्रशालेच्या शैक्षणिक वाटचालीला समृद्ध योगदान मिळाल्याचेही मान्यवरांनी नमूद केले.
आठवणींच्या हिंदोळ्यावर भावूक झाल्या मारिया फर्नांडिस
सत्काराला उत्तर देताना टीचर मारिया फर्नांडिस यांनी मिलाग्रीस प्रशालेतील आपल्या प्रदीर्घ सेवाकाळातील अनेक जुन्या, सुखद आणि अविस्मरणीय आठवणींना उजाळा दिला. विद्यार्थ्यांसोबतचे अनुभव, सहकाऱ्यांचे प्रेम आणि शाळेने दिलेली आपुलकी यांचा उल्लेख करताना त्यांच्या मनातील भावनांना वाट मोकळी झाली.
‘सेवानिवृत्ती हा सेवेला पूर्णविराम नसून, आयुष्याच्या एका सुंदर पर्वातून दुसऱ्या पर्वाकडे जाण्याचा क्षण आहे,’ अशा भावनेने या सोहळ्याला उपस्थित असलेल्या प्रत्येकाच्या मनात कृतज्ञतेची भावना दाटून आली.
अखेर उपस्थित मान्यवर, शिक्षक, कर्मचारी, विद्यार्थी आणि कुटुंबीयांनी मारिया फर्नांडिस यांना भावी आयुष्यासाठी निरोगी, आनंदी, सुखसमृद्ध आणि समाधानमय जीवनाच्या मनःपूर्वक शुभेच्छा दिल्या.
या भावस्पर्शी कार्यक्रमाचे सुरेख सूत्रसंचालन प्रशालेचे शिक्षक सर गणेश डिचोलकर आणि टीचर अँथोनीसा फर्नांडिस यांनी केले. तर ज्येष्ठ शिक्षक श्री. विवेकानंद जोशी यांनी आभार प्रदर्शन केले.
ज्ञानदानाची अनेक वर्षांची अखंड ज्योत तेवत ठेवणाऱ्या मारिया फर्नांडिस यांच्या सेवेचा हा गौरवसोहळा त्यांच्या कार्याची केवळ सांगता नव्हे, तर त्यांनी घडवलेल्या असंख्य विद्यार्थ्यांच्या मनात कायम जिवंत राहणाऱ्या आठवणींचा भावपूर्ण उत्सव ठरला.
