सावंतवाडी : गुरु-शिष्य नात्यातील आदर, प्रेम आणि कृतज्ञतेचा भाव जपत मिलाग्रिस हायस्कूलमध्ये शिक्षक दिन मोठ्या उत्साहात आणि आनंदमय वातावरणात साजरा करण्यात आला. शिक्षकांच्या सन्मानार्थ विद्यार्थ्यांनी आयोजित केलेल्या विविध कार्यक्रमांनी संपूर्ण शाळेचा परिसर उत्साहाने भारून गेला.
कार्यक्रमाची सुरुवात मंगलमय वातावरणात प्रार्थनेने झाली. त्यानंतर मान्यवरांच्या हस्ते दीपप्रज्वलन करून कार्यक्रमाचे औपचारिक उद्घाटन करण्यात आले. शिक्षकांच्या स्वागतासाठी विद्यार्थ्यांनी लेझीमच्या तालावर केलेल्या उत्साहपूर्ण स्वागताने कार्यक्रमाची सुरुवातच दणक्यात झाली.
यानंतर विद्यार्थ्यांनी आपल्या लाडक्या शिक्षकांसाठी विविध मनोरंजनात्मक आणि सांस्कृतिक कार्यक्रमांची मेजवानी सादर केली. नृत्य, गाणी, विनोदी सादरीकरणे तसेच विद्यार्थ्यांनी सादर केलेल्या सुंदर नाटकाने उपस्थितांची मने जिंकली. प्रत्येक सादरीकरणाला शिक्षक आणि विद्यार्थ्यांकडून उत्स्फूर्त दाद मिळत होती.
यावेळी विद्यार्थी अभिजित गवस याने शिक्षक दिनाचे महत्त्व आपल्या मनोगतातून प्रभावीपणे मांडले. विद्यार्थ्यांच्या जीवनाला योग्य दिशा देण्यात शिक्षकांची असलेली भूमिका अधोरेखित करत त्याने सर्व शिक्षकांप्रती कृतज्ञता व्यक्त केली.
यानंतर मुख्याध्यापक फा. रिचर्ड सालदान्हा यांनी शिक्षक दिनानिमित्त प्रेरणादायी मार्गदर्शन केले. शिक्षक हे विद्यार्थ्यांच्या आयुष्याला आकार देणारे शिल्पकार असून, त्यांच्या योगदानाचा सदैव आदर केला पाहिजे, असा संदेश त्यांनी विद्यार्थ्यांना दिला.
कार्यक्रमात शिक्षकांसाठी आयोजित करण्यात आलेल्या ‘स्पॉट प्राईजेस’ उपक्रमामुळे सोहळ्याला आणखी रंगत आली. या उपक्रमात शिक्षकांनीही उत्स्फूर्त सहभाग घेतल्याने वातावरणात हास्याचे आणि आनंदाचे फवारे उडाले.
विद्यार्थ्यांनी आपल्या शिक्षकांप्रती व्यक्त केलेला आदर, प्रेम आणि कृतज्ञता हे या शिक्षक दिन सोहळ्याचे प्रमुख आकर्षण ठरले. विविध सांस्कृतिक, मनोरंजक आणि भावपूर्ण कार्यक्रमांनी सजलेला हा शिक्षक दिनाचा सोहळा आनंद, उत्साह आणि अविस्मरणीय आठवणींची शिदोरी देत दिमाखात संपन्न झाला.
